BÖL, PARÇALA VƏ İDARƏ ET
- 2025-07-09
Selma Məmmədova- Bloqlar
Tarix boyu idarəetmədə effektivliyin artırılması üçün istifadə olunan məşhur yanaşmalardan biri də “böl, parçala və idarə et” prinsipidir. Bu üsul, kompleks sistemləri kiçik və idarəolunan hissələrə ayırmaqla, onları daha rahat idarə etməyi mümkün edir. İnsan resursları da bu prinsipdən istifadə edərək təşkilatın fərqli strukturlarında çalışan insanları funksional bölmələrə ayırır, rolları dəqiqləşdirir və bu rollar üzərində sistemli nəzarət aparır.
Lakin müasir HR bu yanaşmanı daha humanist və şəffaf formada tətbiq edir. Bu gün artıq "idarə et" ifadəsi təkcə nəzarət etmək anlamına gəlmir – inkişaf etdirmək, motivasiya etmək və istiqamətləndirmək kimi anlayışları da özündə birləşdirir.
İnsan resursları (HR) çoxlarının düşündüyü kimi yalnız sənəd işləri və ya əmək müqavilələrinin tərtibindən ibarət deyil. Bu sahə idarəetmə sahələrindən biridir. Bir təşkilatın davamlı uğurunda insan amili ön plandadır və məhz bu insan faktorunu düzgün yönəltmək, idarə etmək strateji və operativ idarəetmə bacarıqları tələb edir.
Şirkətin maliyyə, texnologiya və informasiya resursları nə qədər əhəmiyyətlidirsə, insan kapitalı da bir o qədər vacib və stratejidir. İnsan resursları sahəsində mütəxəssis olmaq istəyən hər bir şəxs ilk növbədə idarəetmə prinsiplərini və təməl nəzəriyyələri bilməlidir. HR mütəxəssisi yalnız "işçini işə qəbul edən" deyil, şirkətin bütün insan gücünü yönəldən və inkişaf etdirən strateji partnyor olmalıdır.
İnsan resursları sahəsində çalışan hər bir şəxs bilməlidir ki:
- İnsanları anlamaq üçün psixologiyaya,
- Rəhbərlik etmək üçün liderliyə,
- Qərar vermək üçün analitik bacarıqlara,
- Davranış yönləndirmək üçün isə emosional intellektə ehtiyac var.
Günümüzdə HR peşəkarı artıq kağız sənədlərlə deyil, insanla işləyir. Onun işi motivasiya vermək, komanda ruhu yaratmaq, konfliktləri idarə etmək və ən əsası da insan potensialını maksimum səviyyəyə çatdırmaqdır.
Əgər bu sahədə həqiqətən mütəxəssis olmaq istəyirsinizsə, ilk öyrənəcəyiniz şeylər yalnız Əmək Məcəlləsi və CV seçimi olmamalıdır. İdarəetmə elmini mənimsəmək, liderlik bacarığı və strateji düşüncə sizin əsl gücünüz olacaq.